Papa Benedikto ku Mons Luis

Biografia di Mgr. Luis Antonio Secco, SDB

Mgr. Luis a nasé na Piazzola Sul Brenta, Padua, Italia dia 8 di yüni 1947, e ta e delaster di un famia di shete ruman.  El a drenta Seminario Salesiano na ana 1958 te ku 1963, ora el a pidi pa bai Venezuela komo mishonero, kaminda el a sigui e diferente etápanan di formashon salesiano; el a realisá e ana di novisiado na San Antonio de los Altos. El a a hasi su profeshon religioso dia 16 di Ougùstùs di ana 1964 pa keda inkorporá na e Kongregashon Salesiano di Don Bosco (S.D.B.).  Despues di a kumpli ku “curriculum” di studio di filosofia na Caracas i San Antonio de los Altos ( for di aña 1964 te ku 1968) i a lográ su diploma di “Bachiyer den filosofia” el a bai pa un eksperensia pedagógiko di tres aña na Colegio (internat) Salesiano “Dominico Savio” na Los Teques.  Rev. Luis Antonio Secco a bira saserdote dia 27 di Maart 1975.

Ya komo saserdote salesiano el a traha na Los Teques, komo responsabel di pastoral den Seminario Menor te na aña 1980, ora ku el a ser destiná pa bini Kòrsou, pa kuminsá un proyekto di pastoral hubenil i katekesis pa henter nos Diosesis di Willemstad. Den Parokia di Buenavista huntu ku Pader Fernando, Pader Arkangel i despues Pader Félix, e tabata responsabel di komunidat religiosa salesiano i tambe di e Parokia i a traha un proyekto di katekesis di Promé Santa Komunion i konfirmashon pa forma despues gruponan hubenil den diferente parokia di Kòrsou. Na aña 1985, Provinsial Salesiano di Venezuela a mandé komo direktor spiritual di hóbennan postulante salesiano na Los Teques, Venezuela. Despues di esei, na aña 1991 el a haña oportunidat di bai Roma, kaminda el a sigui dos aña di estudio di teologia na Universidat Pontifisio Salesiano (UPS),  pa logra asina su Lisensia (Master) den Teología Dogmátika.

Na aña 1993 el a bolbe Kòrsou pa sigui komo direktor responsabel di Komunidat salesiano na Buenavista i pa yuda den proyektonan di Pastoral Hubenil i di Katekesis den parokia i skol.

Na aña 1997, el a funkshoná pa un period kortiku komo Vicario ad Interim di Obispado di Willemstad. Funkshon ku e mester a bandoná, despues ku su superiornan a manda busk’e pa e bira “Maestro di Novicios” di Kongregashon Salesiano na San Antonio de Los Altos na Los Teques.

Pader Luis a wordu konsagra komo Obispo dia 28 Oktober 2000 i un aña despues, dia 20 di Oktober 2001, Mgr. Luis a bin instala komo esun di e 12 Obispo ku a encabesá  pueblo katoliko di islanan teritorio di Aruba, Korsou, Boneiru, Sint Marteen (Ulandes), Saba, i Statia, di Obispado di Willemstad.