Seyo di Obispo

ESKUDO DI MGR. LUIS ANTONIO SECCO

Un eskudo ta representá, pa medio di diferente imahen o símbolo, tradishon di un famia, di un hende di gobiérno o di Iglesia. E ta mustra, na un manera simbóliko i kreativo, un program di bida di un persona o di un grupo. Den kaso di e eskudo di Mgr. Luis Antonio Secco SDB nos ta mira den dje diferente elemento, i alomenos sinku (5) tin di haber ku su programa di bida komo Obispo.

1.       Imagen di e Bon Wardadó

Mei mei di e eskudo nos tin e imahen di e Bon wardadó. E pintura aki ta tumá for di katakombe di Roma i ta nifiká bondat i kariño pa e karnénan. E ta karga un karné riba su lomba, ke men ku, meskos ku Hesus, Obispo tin ku buska hende (karnenan) ku ta mas lieu di Dios, esnan ku ta den peliger o pèrdí. E baston ta nifiká guia i defensá pa e karnénan. Den Evangelio Hesus ta splika e komparashon aki, bisando ku E ta e Bon Wardadó (Hn 10,7-16) i ku E ta laga e tarea aki na su apòstelnan i siguidornan, esta Obispo i pastornan.
 

2.       Presensha di Mama Maria

Nos tin e presensia di Mama Maria, pa medio di e logo M-A. E ta e guia i maestra, e ta mama di Iglesia tambe. Den bida di tur hende ku ta sigui Kriitu, Maria ta e Mama presente, manera na ora di kasamentu na Kana di Galilea, ora el a pidi su Yu e milager di kambia awa na biña pa e fiesta bai bon. E ta presente na ora di prueba, ora Hesus ta muri na krus, pa aseptá nos tur komo su yunan. Den tarea pastoral di Obispu, Maria ta okupá un lugá hopi importante den evangelisashon.

3.       Palu di Dividivi

E palu di dividivi ta representa algun típiko di e realidat kaminda e Wardadó(Obispo) tin ku traha. Den e kaso aki ta un símbolo di naturalesa di Antia Ulandes i Aruba. Nos por bisa tambe ku dividivi tin un nifikashon spiritual. Manera e palu aki ta wanta sekura, bientu i kalor,  e ta dobla dor di bientu pero e no ta kibra fasil, asina tambe mester ta nos bida di fe komo kristian- katóliko; ounke den nos bida nos mester pasa dor di hopi pruebanan, nos fe tin ku keda para firme, e por dobla den e momentunan difísil pero  e no ta kai i  ta keda  bèrde.
 

4.       Seis streanan

E seis streanan riba santu, dilanti di e bon Wardadó, ta nifiká e seis islanan ku ta forma e teritorio di Diósesis di Willemstad (Antia Ulandes i Aruba)
 

5.       Shelu, laman i playa.

Shelu, laman i playa ta tres parti importante ku ta konformá e paisahe di e seis islanan. Ta un regalo di Dios ku hopi hende di otro pais ta bin disfrutá di e dushi ambiente natural i ku ta fuente di rekesa pa nos pueblo.
 

6.       E lema di Mgr. Luis

Veritetem Facientes in Caritate - Bibando Bèrdat den Spiritu di Karidat

E ta un programa di bida ku ta eksigí hopi di nos tur, kuminsando di esnan ku Dios a pone komo guia esta obispu i padernan. Nos tur tin ku buska bèrdat, sinseridat; Hesu Kristu ta e bèrdat pleno, pero pa logra esei nos tin ku kana e kaminda di amor ku ta bondat i miserikordia den tur situashon di bida. E sombré i e kabuyanan pafó di e eskudo ta ekspresá e mishon di Obispu ku ta  esun di animá e komunidat  Kristian ku Dios a konfié