Bishita “Ad limina Apostolorum”

Manera a anunsiá den e siman di Pasku di Resurekshon, mi mester a bai Roma pa e bishita “Ad limina Apostolorum” huntu e otro obispunan ku ta pertenesé na Antilles Episcopal Conference (AEC).

Segun tradishon den Iglesia Katóliko, kada sinku aña tur obispu di mundu katóliko, aktualmente nos ta mas  5000, ta bai huntu ku demas miembro di su Konferensha Episkopal, den un sorto di peregrinashon pa bishitá Sede Apostóliko. E peregrinashon aki ta inklui un enkuentro personal ku Papa, un oudiensia di tur e obispunan ku ta forma e Konferensha Episkopal, den nos kaso nos tabata 15 obispu, bishita na diferente dikasterio òf komishonan ku ta yuda Papa den e tarea di guia henter Iglesia katóliko rònt mundu, i alabes nos a selebrá Misa den e luganan mas importante i mas santu di Iglesia katoliko, manera e tumba di Apòstelnan Pedro i Pablo, i na Basilika di Sta. Maria Mayor.

Nos a profesá nos fe pa medio di “Credo” i nos a resa pidi Hesus nos Bon Wardador pa e yuda nos kumpli ku e tarea ku Iglesia a konfia na kada un di nos komo obispu pa salbashon propio i di kada fiel ku forma nos komunidat diosesano. Nos a bishitá tambe algun komnidat religioso ku a invitá nos pa komparti algun momentu di orashon i di alegria kristian.

Mi por bisa ku tabata un eksperensha hopi profundo di union, di fraternidat, di fe i sin duda di hopi speransa riba futuro di nos Iglesia katóliko, mirando Spiritu Santu ta guia su Iglesia, kon Papa i su kolaboradornan na Roma ta asina interesá pa scucha i komparti legria i tristesa, éksito i frakaso di kada obispu i duna nos palabra di konsolashon i di animo pa sigui ku nos tarea.

Un dje puntonan mas krusial riba nos agènda komo konferensha episkopal ta e situashon presente i futuro di nos Seminario na Trinidad, pa motibu di e skarsedat di seminaristanan, aktualmente tin 16. E aña aki 6 di nan ta laga e seminario pasobra nan ta bira saserdote i ta parse ku ningun kandidato nobo ta bai drenta seminario. Tambe tin skarsedat di formadó i di dosente den Seminario. Otro prekupashon grandi ta nos edukashon katóliko i formashon kristian tantu pa hóben komo tambe pa adulto. Tur obispu di nos konferensha a bai di akuerdo pa traha pa un identidat di nos skolnan katóliko mas fuerte ku mas formashon kristian: bibliko, litúrgiko i moral.

Nos a tuma tambe komo prioridat pastoral den tur nos Diósesis, e Mishon ku Dokumento di Aparecida ta pidi den e próksimo añanan i mas spesifikamente nos ke dirigi tur nos esfuerso pa un formashon kristian mas profundo pa hóben i adulto, hasiendo bon uso di e dokumentu di Aparecida i tambe di e material ku nos Konferensha Episkopal ta bai prepara riba e área di katekesis.

Ku Bon Dios i Mama Maria yuda nos kumpli ku e tareanan aki i bendihsoná nos tur.

Boso ruman i sirbisdó,

Mgr. Luis A. Secco