Mensahe di Obispo pa 2010

Written by Administrator

Monday, 04 January 2010

SEIS ISLA UNÍ DEN MISHON Un regenboog di pas i union riba Kòrsou Deseonan di Obispado di Willemstad pa Aña Nobo 2010 Obispado di Willemstad ta yama Dios danki pa Aña 2009 ku a nifiká pa Iglesia katóliko di Antia i Aruba, un aña di trabou pastoral intenso ku implementashon di e Plan Pastoral Mishon 2008-2011 na nivel di tur seis isla. Nos ke gradisí Señor ku a duna nos bida i salú i ku forsa di Spiritu Santu a lanta den tur parokia un deseo di renobashon di nos bida kristian bou di guia di vikarionan den e diferente área i ku sosten generoso di pastor i laikonan.  Nos ta drenta aña 2010 ku mas ánimo pa kumpli ku e lema: SEIS ISLA UN DEN KRISTU i SEIS ISLA UNÍ DEN MISHON!.     Mirando e desafionan grandi ku Antia tin pa e aña nobo 2010 na nivel estatal, Obispado ta invitá tur mandatario, tur responsabel di sosiedat sivil i tur hende di bon boluntat pa uni den spiritu di amor i solidaridat, pa karga huntu e responsabilidat ku ta warda nos tur. Na kuminsamentu di e aña nobo aki, laga nos tuma e imahen bíbliko di e regenboog ku a marka fin di un momentu grandi di prueba pa humanidat i a duna speransa nobo. Pa Laga e regenboog aki para riba nos Islanan, na un manera partikular riba Antia ku ta yamá pa elekshonnan den e próksimo dianan. Nos ta pidi pa Kòrsou, pa tur partido forma huntu e koló di e regenboog aki i pone Kòrsou sentral. Laga nos pueblo keda protehá pa e regenboog di pas, solidaridat i speransa riba futuro. Un regenboog ku ta nifiká un Aliansa Nobo entre Dios i hende, entre tur e partidonan, entre gobièrno i sosiedat sivil, entre nos tur ku ta kere den Dios i den Hesukristu den e diferente denominashon i religion ku nos ta profesá. Ku Señor Hesus ku a bini na mundu pa mustra e amor ku Dios tin pa hende uni nos tur komo ruman, sin diferensha di kredo, resa i nashonalidat. Un Felis i Bendishoná Aña 2010 bou di e regenboog di tur e kolònan ku ta forma e diferente partido, gremio i rikesa religioso i kultural ku ta forma nos pueblo. I Bendishon di Dios todopoderoso Tata, Yu i Spiritu Santu baha riba boso i keda semper ku boso. AMEN!